घुग्घुस (चंद्रपुर) : ईव्हीएम मशीन विरोधात घुग्घुस काँग्रेस कमिटी आणि सामाजिक संघटनांच्या वतीने लोकशाही बचाव पदयात्रा आयोजित करण्यात आली. ही पदयात्रा 23 डिसेंबर 2024 रोजी सकाळी 9 वाजता घुग्घूस येथील डॉ. बाबासाहेब आंबेडकर स्मारकापासून सुरू झाली आणि सायंकाळी 5 वाजता चंद्रपूर जिल्हाधिकारी कार्यालय येथे समाप्त झाली. यावेळी आंदोलनकर्त्यांनी “बॅलेट पेपरवर निवडणुका घ्या” अशी मागणी करीत निवासी जिल्हाधिकाऱ्यांना निवेदन सादर केले.
पदयात्रेचे नेतृत्व व मागण्या
पदयात्रेचे नेतृत्व काँग्रेस अध्यक्ष राजुरेड्डी यांनी केले. त्यांच्या नेतृत्वाखाली खासदार प्रतिभा धानोरकर, काँग्रेस शहर जिल्हाध्यक्ष रितेश तिवारी, महिला नेते, युवक नेते, सामाजिक कार्यकर्ते, आणि शेकडो पदाधिकारी यात सहभागी झाले.
आंदोलनकर्त्यांनी “इव्हिएम हटाव, देश बचाव”, “माझं मत कुणाला गेलं?” अशा घोषणांद्वारे लोकशाहीत पारदर्शकतेची मागणी केली.
आरोप व मुद्दे
1. इव्हिएम मशीनवरील संशय:
महाराष्ट्र विधानसभेच्या निवडणुकांमध्ये भारतीय जनता पक्षाच्या विजयामध्ये दिसलेल्या विसंगतींमुळे मतदारांचा इव्हिएमवर विश्वास उरलेला नाही.
2. बॅलेट पेपरची मागणी:
अमेरिका, जर्मनी, ब्रिटन यांसारख्या प्रगत देशांप्रमाणे भारतातील निवडणुका बॅलेटवर घ्याव्यात, अशी मागणी करण्यात आली.
3. शेतकरी व युवकांचे प्रश्न:
आंदोलनकर्त्यांनी शेतकरी व युवकांच्या समस्या मांडल्या. शेतमालाला योग्य भाव नसणे, महागाई, बेरोजगारी आणि उद्योग बंद पडण्याचे मुद्दे उपस्थित केले.
देशभरातील दडपशाहीवर आरोप
पदयात्रेत आरोप करण्यात आला की, सरकार निवडणुकांमध्ये इव्हिएमद्वारे सत्तेवर येत आहे. मारकडवाडी येथील ग्रामस्थांनी सत्यशोधनासाठी बॅलेटवर निवडणुकीचा आग्रह धरल्यावरही त्यांना पोलीस बळाचा सामना करावा लागला.
प्रमुख उपस्थिती
पदयात्रेत काँग्रेस, राष्ट्रवादी काँग्रेस, एन.एस.यू.आय, महिला आघाडीचे अनेक प्रमुख नेते व कार्यकर्ते सहभागी झाले. यात सैय्यद अनवर, प्रतीभा धानोरकर, दिलीप पिट्टलवार, आकाश चिलका, आणि सुनंदा धोबे यांच्यासह अनेक सामाजिक व राजकीय नेत्यांचा समावेश होता.
सदर पदयात्रेमुळे इव्हिएमवर चालू असलेला वाद अधिकच तीव्र झाला असून, लोकशाहीच्या भवितव्याबाबत जनतेत सजगता निर्माण होण्याचे चित्र दिसत आहे.
