मुंबई : मुख्यमंत्री देवेंद्र फडणवीस यांच्या अध्यक्षतेखाली सह्याद्री राज्य अतिथिगृह येथे महाराष्ट्र राज्य विद्युत मंडळाच्या सूत्रधारी कंपनीच्या संचालक मंडळाची बैठक झाली. ऊर्जा राज्यमंत्री आणि मंडळाच्या उपाध्यक्ष मेघना बोर्डीकर यांचीही या बैठकीत उपस्थिती होती.
या बैठकीत मुख्यमंत्र्यांनी राज्यातील सौरऊर्जा प्रकल्पांना गती देण्याचे निर्देश दिले आणि कामांमध्ये गुणवत्ता राखण्यावर भर दिला. त्यांनी राज्य ऊर्जा क्षेत्र स्वयंपूर्ण करण्याचा निर्धार व्यक्त केला आणि विजेशी संबंधित सर्व कंपन्यांना सुस्थितीत आणण्याची गरज अधोरेखित केली.
मुख्यमंत्र्यांनी ऊर्जा विभागांतर्गत येणाऱ्या तक्रारी कालमर्यादेत सोडवण्यासाठी जिल्हा व विभागीय स्तरावरील यंत्रणा अधिक सक्षम करण्याच्या सूचनाही दिल्या. त्यांच्या या प्रयत्नांमुळे राज्यातील ऊर्जा क्षेत्रात मोठी सुधारणा होण्याची अपेक्षा व्यक्त होत आहे.
