यवतमाळ : यवतमाळ पोलिसांच्या स्थानिक गुन्हे शाखेने झारखंडमधील नक्षल दलम कमांडर तुलसी उर्फ दिलीप महतो याला अटक करून मोठे यश मिळवले आहे. तब्बल दीड महिन्याच्या शोध मोहिमेनंतर लकडगंज परिसरातून त्याला अटक करण्यात आली.
दीर्घकालीन नक्षली कारवायांमध्ये सहभाग
दिलीप महतो 1993 मध्ये नक्षली चळवळीत सामील झाला होता. 1997 पर्यंत तो झारखंडमधील भूतीया पहाडगंज भागाचा एरिया कमांडर म्हणून कार्यरत होता. त्याच्यावर नक्षली हल्ल्यांचे सहा गंभीर गुन्हे दाखल आहेत.
2004 पासून यवतमाळमध्ये लपून राहिला
नक्षली चळवळीतून दूर राहत 2004 पासून दिलीप महतो यवतमाळ जिल्ह्यात राहू लागला. सहा वर्षे मारेगाव आणि दोन वर्षे पारवा येथे वास्तव्य केल्यानंतर, त्याने यवतमाळ शहरात ठाण मांडले. येथे तो ट्रक ड्रायव्हर म्हणून काम करत होता आणि गुप्तपणे आपले जाळे टिकवून ठेवले होते.
गुप्त माहितीच्या आधारे कारवाई
यवतमाळ पोलिस अधिक्षक कुमार चिंता यांच्या मार्गदर्शनाखाली स्थानिक गुन्हे शाखेने गुप्त माहितीच्या आधारे शोधमोहीम राबवली. अखेर लकडगंज परिसरात महतोला अटक करण्यात यश आले. या कारवाईमुळे जिल्ह्यात मोठी खळबळ उडाली आहे.
पुढील तपास सुरू
पोलिसांनी महतोच्या भूतकाळातील हालचाली आणि संपर्कांची तपासणी सुरू केली असून, त्याच्या नक्षल चळवळीसोबत असलेल्या संबंधांची चौकशी करण्यात येत आहे. पुढील तपास सुरू असल्याची माहिती पोलिसांनी दिली आहे.
