गडचिरोली : जिल्ह्यात नक्षलवाद्यांविरोधात लढताना वीरगती प्राप्त झालेल्या सी-60 कमांडो महेश नागुलवार यांच्या बलिदानाला संपूर्ण महाराष्ट्राने सलाम केला आहे. मुख्यमंत्री देवेंद्र फडणवीस यांनी त्यांच्या शौर्याला आदरांजली अर्पण करत “महेश नागुलवार यांचे बलिदान व्यर्थ जाणार नाही” असे म्हटले आहे.
माओवाद्यांविरोधात मोठी कारवाई
गडचिरोलीच्या भामरागड तालुक्यातील फुलनार जंगल परिसरात सी-60 कमांडोंनी नक्षलवाद्यांविरोधात मोठी कारवाई करत त्यांचा गड उद्ध्वस्त केला. मात्र, याच कारवाईदरम्यान महेश नागुलवार गंभीर जखमी झाले आणि उपचारादरम्यान त्यांचे दुःखद निधन झाले.
राज्य सरकारची मदतीची घोषणा
मुख्यमंत्री देवेंद्र फडणवीस यांनी शहीद महेश नागुलवार यांच्या कुटुंबीयांसाठी 2 कोटी रुपयांचे आर्थिक सहाय्य जाहीर केले आहे. तसेच, विविध शासकीय लाभ देण्याचे आश्वासनही दिले आहे.
मुख्यमंत्र्यांचा पोलिस अधिकाऱ्यांशी थेट संवाद
घटनेची माहिती घेतल्यानंतर मुख्यमंत्री फडणवीस यांनी गडचिरोली पोलिस अधीक्षकांशी थेट संवाद साधला. “महाराष्ट्र पोलिस दल आणि संपूर्ण राज्य नागुलवार कुटुंबीयांसोबत आहे,” असे त्यांनी सांगितले.
सैन्य सन्मानासह अंतिम निरोप
आज गडचिरोली पोलिस मुख्यालयाच्या पटांगणात महेश नागुलवार यांच्या पार्थिवाला शासकीय मानवंदना देण्यात आली. या वेळी अतिरिक्त पोलिस महासंचालक राजकुमार व्हटकर आणि जिल्हाधिकारी अविशांत पंडा यांनी शहीद जवानाच्या पत्नीशी संवाद साधला आणि सर्वतोपरी मदतीचे आश्वासन दिले.
महेश नागुलवार यांचे निस्वार्थ बलिदान महाराष्ट्र कधीही विसरणार नाही. त्यांच्या कुटुंबीयांसोबत संपूर्ण देश खंबीरपणे उभा आहे. जय हिंद!
