घुग्घुस (जि. चंद्रपूर) — आगामी घुग्घुस नगरपरिषद सार्वत्रिक निवडणूक 2025 संदर्भात प्रशासन आणि स्थानिक स्वयंसेवी संस्थांनी मतदार जागृतीला वेग दिला आहे. “मतदान हा आपला अधिकार — त्याचा अभिमान बाळगा!” या घोषवाक्याखाली 2 डिसेंबर रोजी होणाऱ्या मतदानासाठी नागरिकांना मोठ्या प्रमाणात प्रोत्साहित केले जात आहे.
निवडणूक आयोगाने दिलेल्या माहितीनुसार, मतदानाची वेळ सकाळी 7:30 ते संध्याकाळी 5:30 अशी राहणार असून सर्व नागरिकांना मतदान करण्याचे आवाहन करण्यात आले आहे. प्रशासनाने सांगितले की, प्रत्येक मतदाराने मतदान केंद्रावर जाताना ओळखपत्र आवर्जून सोबत ठेवणे आवश्यक आहे.
स्थानिक पातळीवर विविध उपक्रम, रॅली, सोशल मीडिया मोहिमा, बॅनर आणि घोषवाक्यांच्या माध्यमातून नागरिकांना मतदानासाठी प्रेरित केले जात आहे. “आपले एक मत — आपल्या नगराचा भविष्यनिर्माण”, “मतदान करा आणि लोकशाही मजबुत करा”, “मतदान हा आपला अधिकार आहे, त्याचा वापर करा” अशा संदेशांद्वारे नागरिकांमध्ये जागरूकता वाढवली जात आहे.
निवडणूक विभागाने यंदाच्या निवडणुकीत 100% मतदानाचा संकल्प केला असून, प्रत्येक घर, प्रत्येक कुटुंब आणि प्रत्येक मतदारापर्यंत पोहोचण्याचा प्रयत्न करण्यात येत आहे. नागरिकांनी कुटुंबीय, मित्र, शेजारी यांना मतदानासाठी प्रोत्साहित करण्याचे आवाहनही करण्यात आले आहे.
प्रशासनाचे म्हणणे आहे की, लोकशाही मजबूत करण्यासाठी प्रत्येक मतदाराने स्वतःचा संविधानिक हक्क बजावणे अत्यावश्यक आहे.
२ डिसेंबर २०२५ — मतदान करा, भविष्य घडवा!
