घुग्घुस, चंद्रपूर : आ. सुधीरभाऊ मुनगंटीवार सेवा केंद्र आणि आ. सुधीरभाऊ मुनगंटीवार आरोग्य सेवा समिती महाराष्ट्राच्या वतीने शनिवारी, दिनांक २ ऑगस्ट रोजी दुपारी एक सामाजिक उपक्रम राबविण्यात आला. भाजपा जिल्हा महामंत्री विवेक बोढे यांच्या मार्गदर्शनाखाली विविध आजारांवर शस्त्रक्रिया करण्यासाठी ५३ रुग्णांची ७३ वी तुकडी आचार्य विनोबा भावे रुग्णालय, सावंगी (मेघे) येथे रवाना करण्यात आली.
या उपक्रमाचे विशेष वैशिष्ट्य म्हणजे नुकत्याच पार पडलेल्या आ. सुधीर मुनगंटीवार यांच्या वाढदिवसानिमित्त आयोजित भव्य महाआरोग्य शिबिराचे फलित म्हणून ही तुकडी तयार झाली. शिबिरात शेकडो रुग्णांची नि:शुल्क वैद्यकीय तपासणी करण्यात आली होती. यामधून निवडलेल्या ५३ रुग्णांना वैद्यकीय उपचारांकरिता पुढील टप्पा म्हणून सेवाभावी पद्धतीने रुग्णालयात पाठवण्यात आले.
कार्यक्रमात मार्गदर्शन करताना विवेक बोढे म्हणाले, “आ. सुधीरभाऊ मुनगंटीवार सेवा केंद्राच्या माध्यमातून गेल्या अनेक वर्षांपासून निरंतर रुग्णसेवेचे कार्य सुरू आहे. आज ७३ वी तुकडी रवाना होत आहे ही बाब सामाजिक जाणिवेची आणि सेवाभावाची साक्ष आहे. लोकनेते आ. सुधीरभाऊ मुनगंटीवार आणि राजुरा विधानसभा क्षेत्राचे आमदार देवराव भोंगळे हे रुग्णसेवेच्या कार्याला नेहमीच अग्रक्रम देत आले आहेत.”
या उपक्रमांतर्गत आतापर्यंत घुग्घुस परिसरातील २०,००० हून अधिक रुग्णांना नि:शुल्क वैद्यकीय सेवा पुरवण्यात आली आहे. यामध्ये सामान्य तपासण्या, औषधोपचार, तसेच अत्यवस्थ रुग्णांसाठी शस्त्रक्रिया यांचा समावेश आहे. हे आरोग्यसेवेचे कार्य स्थानिक नागरिकांमध्ये विश्वास निर्माण करणारे ठरत आहे.
या प्रसंगी उपस्थित असलेल्यांमध्ये भाजपा नेते निरीक्षण तांड्रा, अमोल थेरे, बबलू सातपूर, सिनू इसारप, सतीश बोन्डे, प्रमोद भोस्कर, योगेश घोडके, गणेश राजुरकर, रज्जाक शेख, अजय लेंडे, मानस सिंग, अजय कोंडागुर्ला, सुनील ब्रह्मे, हनुमान खडसे, संदीप तेलंग आदींचा समावेश होता.
या प्रकारच्या उपक्रमांमुळे समाजात आरोग्याविषयी जागरूकता निर्माण होत असून, सर्वसामान्य नागरिकांपर्यंत वैद्यकीय सुविधा पोहोचविण्याचा एक सकारात्मक आदर्श घुग्घुस परिसरात निर्माण होत आहे.
