विशेष बाब म्हणून 1 कोटी 50 लक्ष रुपये मंजूर
चंद्रपूर : पांढरकवडा (ता.चंद्रपूर) येथील श्री. पंचमुखी हनुमान मंदिराचा कायापालट होणार आहे. विशेष बाब म्हणून राज्य शासनाने या मंदिराच्या विकासासाठी 1 कोटी 50 लक्ष रुपये मंजूर केले आहे.
पांढरकवडा (ता.चंद्रपूर) येथील श्री. पंचमुखी हनुमान मंदीर हे ‘क’ वर्ग दर्जाचे तीर्थक्षेत्र असून या तीर्थक्षेत्राच्या मुलभूत सोयी-सुविधांसाठी 1 कोटी 50 लक्ष रुपयांचे अंदाजपत्रक तयार करण्यात आले होते. याबाबतचा प्रस्ताव जिल्हा प्रशासनाने शासनाकडे सादर केला. मात्र जिल्हास्तरावरील ‘क’ वर्ग तीर्थक्षेत्रांच्या विकास कामासाठी 30 लक्ष रुपयांपर्यंत अर्थसंकल्पीय तरतुद करण्याचे अधिकार मुख्य कार्यकारी अधिकारी यांना होते. या मर्यादेत आता वाढ करण्यात आली असून सदर निधीची मर्यादा 60 लक्ष रुपयांपर्यंत वाढविण्यात आली आहे. मात्र केवळ 60 लक्ष रुपयांत पांढरकवडा येथील पंचमुखी हनुमान मंदिराचा विकास होऊ शकत नाही, त्यासाठी आणखी निधी आवश्यक आहे, असून विशेष बाब म्हणून पंचमुखी हनुमान मंदिराच्या विकास कामांसाठी शासनाने 1 कोटी 50 लक्ष रुपये मंजूर केले आहेत.
