Tanha Pola Festivity in Ghugghus: Gandhi Chowk Comes Alive with Children’s Decorated Nandi Bulls
पारंपरिक संस्कृती, शेतकरी जीवन आणि मातीशी नाते जपणाऱ्या उपक्रमाला नागरिकांचा उत्स्फूर्त प्रतिसाद
घुग्घुस, चंद्रपूर : बैलांप्रती कृतज्ञता व्यक्त करणारा आणि शेतकरी संस्कृतीची आठवण करून देणारा तान्हा पोळा सण घुग्घुस येथे उत्साहपूर्ण वातावरणात साजरा करण्यात आला. पारंपरिक संस्कृतीची ओळख नव्या पिढीला व्हावी आणि चिमुकल्यांच्या मनात आपल्या मातीशी असलेले नाते अधिक घट्ट व्हावे, या उद्देशाने तान्हा पोळा आयोजन समिती घुग्घुस व भारतीय जनता पक्षाच्या वतीने गांधी चौक येथे नंदीबैल सजावट स्पर्धेचे आयोजन करण्यात आले.
चिमुकल्यांनी आपल्या कल्पकतेचा वापर करून नंदीबैलांना विविध रंग, फुले, पारंपरिक वस्त्रे आणि आकर्षक साहित्याने सजविले. सजविलेल्या नंदीबैलांसह चिमुकले मोठ्या उत्साहाने स्पर्धेत सहभागी झाले. त्यांच्या चेहऱ्यावरील आनंद आणि उत्साहाने गांधी चौक परिसराला जणू पारंपरिक सणाची रंगत प्राप्त झाली.
स्पर्धा पाहण्यासाठी नागरिकांनी मोठी गर्दी केली होती. आकर्षक सजावट, पारंपरिक मांडणी आणि चिमुकल्यांचा उत्साह यामुळे संपूर्ण परिसरात उत्सवी वातावरण निर्माण झाले. पालकांनीही आपल्या मुलांना प्रोत्साहन देत या उपक्रमात उत्स्फूर्त सहभाग घेतला.
‘तान्हा पोळा म्हणजे संस्कृतीशी जोडणारा उत्सव’
यावेळी नगरसेवक विवेक बोढे यांनी तान्हा पोळ्याचे महत्त्व सांगताना म्हटले की, तान्हा पोळा ही केवळ परंपरा नसून आपल्या मातीत रुजलेली संस्कृती आणि शेतकरी जीवनाशी जोडलेली भावना आहे. आधुनिक आणि डिजिटल युगात चिमुकल्यांना आपल्या मातीशी, संस्कृतीशी आणि पारंपरिक सणांशी जोडून ठेवण्यासाठी अशा उत्सवांचे आयोजन महत्त्वाचे असल्याचे त्यांनी सांगितले.
अशा उपक्रमांमुळे मुलांमध्ये आपल्या संस्कृतीबद्दल प्रेम, अभिमान आणि जिव्हाळा निर्माण होतो, असेही त्यांनी नमूद केले.
कार्यक्रमाला नगरसेवक विवेक बोढे, ठाणेदार प्रकाश राऊत, आयोजन समितीचे अध्यक्ष गणेश कुटेमाटे, शिवसेनेचे शहराध्यक्ष महेश डोंगे, सुरेंद्र भोंगळे, सतीश बोन्डे, प्रयास सखी मंचच्या अध्यक्षा किरण बोढे यांच्यासह विविध मान्यवर उपस्थित होते.
चिमुकल्यांच्या कलागुणांना मिळाले प्रोत्साहन
स्पर्धेतील विजेत्यांना मान्यवरांच्या हस्ते पारितोषिके देऊन सन्मानित करण्यात आले. प्रथम पारितोषिक २ हजार १ रुपये जान्हवी सावे, द्वितीय १ हजार ५०१ रुपये अंश कोयाडवार, तृतीय १ हजार १ रुपये रेआंश बोबडे, चतुर्थ ७०१ रुपये मोहित बोबडे, तर पंचम ५०१ रुपये मयंक घाटे यांनी पटकावले.
विजेत्यांना सन्मानचिन्ह देऊन गौरविण्यात आले. विशेष म्हणजे, स्पर्धेत सहभागी झालेल्या सर्व चिमुकल्यांना प्रोत्साहनपर पारितोषिक देण्यात आले. त्यामुळे सहभागी मुलांच्या चेहऱ्यावर आनंद पाहायला मिळाला.
सलग नवव्या वर्षी संस्कृती जपण्याचा उपक्रम
घुग्घुसमध्ये नंदीबैल सजावट स्पर्धेचे यंदाचे हे सलग नववे वर्ष आहे. गेल्या नऊ वर्षांपासून तान्हा पोळ्याच्या माध्यमातून पारंपरिक संस्कृती जपण्यासोबतच बालकांना आपल्या सण-परंपरांची ओळख करून देण्याचे कार्य आयोजन समितीकडून केले जात आहे.
आजच्या बदलत्या जीवनशैलीत पारंपरिक सणांचे महत्त्व पुढील पिढीपर्यंत पोहोचविणाऱ्या या उपक्रमाचे नागरिकांकडून कौतुक करण्यात आले.
कार्यक्रमाचे संचालन शंकर नागपुरे यांनी केले, तर आभार संजय भोंगळे यांनी मानले. कार्यक्रमाच्या यशस्वीतेसाठी आयोजन समितीच्या सदस्यांनी विशेष परिश्रम घेतले.
