घुग्घुस, चंद्रपूर : 23 जुलै 2025 रोजी घुग्घुस येथील रहिवासी दिलीप इंगोले यांचे महत्त्वाचे कागदपत्रे आणि रक्कम असलेले पाकीट हरवले होते. ही बाब चिंतेची असतानाच, घुग्घुसमधीलच दुसरे रहिवासी विनोद सदाशिव कामतवार यांना हे पाकीट सापडले.
स्वतःकडे न ठेवता कामतवार यांनी प्रामाणिकपणे ते पाकीट घुग्घुस पोलीस ठाण्यात जमा केले. पोलिसांनी आवश्यक पडताळणी केल्यानंतर हे पाकीट दिलीप इंगोले यांचे असल्याचे निश्चित केले आणि त्यांना ते सुरक्षितपणे परत करण्यात आले.
या प्रामाणिकतेच्या आणि सामाजिक जाणीवेच्या उदाहरणाबद्दल घुग्घुस पोलीस ठाण्याच्या वतीने विनोद कामतवार यांचा सन्मान करण्यात आला. पोलिस अधिकाऱ्यांनी त्यांच्या सचोटीचे कौतुक करत समाजासाठी एक प्रेरणादायक उदाहरण असल्याचे सांगितले.
दिलीप इंगोले यांनीही कामतवार यांचे तसेच पोलीस प्रशासनाचे आभार मानले. या घटनेमुळे समाजात अजूनही प्रामाणिकपणा, सहकार्य आणि माणुसकी टिकून असल्याचा सकारात्मक संदेश मिळाला आहे.
