जालना: विना अनुदानित शिक्षकांच्या विविध मागण्यांसाठी आज जालना जिल्हाधिकारी कार्यालयावर मोर्चा काढण्यात आला. या आंदोलनादरम्यान, आपल्या मागण्यांकडे सरकारचे लक्ष वेधण्यासाठी शिक्षकांनी अंगावर ज्वलनशील पदार्थ ओतून आत्मदहन करण्याचा प्रयत्न केला. मात्र, पोलिसांनी वेळीच हस्तक्षेप करत संबंधितांना ताब्यात घेतले आणि संभाव्य अनर्थ टाळला.
शिक्षकांनी २० टक्के अनुदानाचा पुढील वाढीव टप्पा लवकरात लवकर लागू करावा यासह अन्य मागण्यांसाठी हे आंदोलन केले. जिल्हाधिकाऱ्यांना मागण्यांचे निवेदन सादर केल्यानंतरही समाधानकारक उत्तर न मिळाल्याने काही आंदोलकांनी टोकाची भूमिका घेतली.
दरम्यान, पोलिसांनी आंदोलक शिक्षकांना समजूत घालत ताब्यात घेतले असून परिस्थिती नियंत्रणात आहे. शिक्षक संघटनांनी सरकारला इशारा दिला आहे की, जर लवकरच मागण्या पूर्ण झाल्या नाहीत, तर आंदोलन अधिक तीव्र केले जाईल.
